នាព្រឹកថ្ងៃទី១៣ ខែកក្កដា ឆ្នាំ២០២៣ អគ្គលេខាធិការដ្ឋានព្រឹទ្ធសភា (អ.ពស) និងក្រុមហ៊ុន Huawei បានរៀបចំសិក្ខាសាលាស្តីពី ការពន្លឿនហេដ្ឋារចនាសម្ព័ន្ធឌីជីថល និងការបង្កើតតម្លៃថ្មីសម្រាប់សេដ្ឋកិច្ចឌីជីថល ដើម្បីចែករំលែកចំណេះដឹង បទពិសោធន៍ថ្មីៗ ជូនដល់មន្ត្រីរាជការនៃអគ្គលេខាធិការដ្ឋានព្រឹទ្ធសភា។ អង្គសិក្ខាសាលាប្រព្រឹត្តទៅរយៈពេលមួយព្រឹក ក្រោមអធិបតីភាពឯកឧត្តម អ៊ុំ សារឹទ្ធ អគ្គលេខាធិការព្រឹទ្ធសភា លោក លីង អ៊ូ នាយកផ្នែកយុទ្ធសាស្ត្ររបស់ក្រុមហ៊ុន Huawei ប្រចាំតំបន់អាស៊ីប៉ាស៊ីហ្វិចដោយមានការអញ្ជើញចូលពីថ្នាក់ដឹកនាំ និងមន្ត្រីរាជការមកពីគ្រប់អង្គភាពចំណុះអគ្គលេខាធិការដ្ឋានព្រឹទ្ធសភាចំនួន៧០នាក់ នៅសាលសិក្ខាសាលាខាងជើង វិមានព្រឹទ្ធសភា។ អង្គសិក្ខាសាលាផ្តោតលើប្រធានបទសំខាន់ៗ រួមមាន៖ ១.ឌីជីថលនីយកម្ម និងសេដ្ឋកិច្ចឌីជីថល មាន៖ ផ្លាស់ប្តូរ និន្នាការ និងតម្លៃ។ ២.គំរូយុទ្ធសាស្ត្រឌីជីថលជាតិ មាន៖ក្របខណ្ឌ ធាតុសំខាន់ គម្រូ និងករណី។ ៣.ហេដ្ឋារចនាសម្ព័ន្ធឌីជីថលគឺជាមូលដ្ឋានគ្រឹះ មាន៖ កសាង អភិវឌ្ឍ និងនវានុវត្តន៍៕
ប្រភព៖ នាយកដ្ឋានព័ត៌មាន
